Ыам ыйын 20 күнүгэр күммүт анаан минээн сандаарыччы тыган оҕолуу үөрүҥ көтүҥ диэбиттии, кэҕэ кэрэ куолаһа сайын кэллэ күөххэ тахсыҥ диэн ыҥыран икки улахан улуус, Мэҥэ Хаҥалас уонна Хаҥалас улууһун Тиит Эбэ сэлиэнньэтин  аҕа саастаах дьонун түмсүүлэрэ мустан айылҕаҕа «Сайыны көрсүү» тэрээһин тэрийдибит. Ыалдьыттарбыт улахан автобуһунан айаннаан кэлбиттэрин кэннэ Түмэл дьиэтигэр, ытык Тыгын маһыгар сырытыннардыбыт. Тэрээһиммитин Мэндэ Үрэх Үрдүгэр ыыттыбыт. Арыллыыга нэһилиэкпит аҕа баһылыга Яковлев А. А., Майа с. баһылыгын соц. боппуруоска эппиэттээх специалист эҕэрдэлэрин тиэртилэр. Эбэбит мууһа этэҥҥэ устан, күөххэ үктэммит үөрүүбүтүн Алгыһынан Т. Е. Сивцева Сайнаара түстээтэ,тойугунан М. Дьячковская киэргэттэ, ол кэннэ төгүрүччү хаамсан буруонан  ыраастанныбыт. Махталбыт бэлиэтин Мэндэ үрэхпитин арыылаах алаадьынан күндүлээтибит. Байанайдаах булчут уолаттарбыт күндүлээбит бидиличчи буһарыллыбыт кус миинин, этин төгүрүччү олорон амсайдыбыт.Икки түмсүү салайааччылара Мария Дмитриевна, Алевтина Петровна эҕэрдэлэрин эттилэр, түмсүүлэрин билиһиннэрдилэр. Дьэ ол кэннэ ырыа ылланна, оонньуулар оонньоннулар, гармошка тыаһа, ырыа арыаллаах күөх халлааҥҥа күөрэйэ көттө. Күрэхтэһии түмүгүнэн Майа сэлиэнньэтин түмсүүтэ бастаата. Киэһэтин кулууп дьиэҕэ Акция концерт көрдүбүт,талааннарын сөхтүбүт. Маннык түмсүүлэр, билсиһиилэр ыытыллаллара наһаа наадалааҕын бу күн туоһу буолла.