Муус устар 8 күнүгэр, Дьокуускай куоракка, Улуу Туймаада туонатыгар, сахалыы балаҕан дьиэтин уораҕайыгар, биир дойдулаахтарбытын ыҥыртаан «КЭЛ олор кэпсэтиэх» тэрээһин ыытылынна. Остуолбутугар, дьоммут астаабыт астарын хоточчу ууран бэлэмнээн болдьоммут бириэмэтигэр маанылаах күндү дьоммут тиийэн тиксэн кэллилэр. Тэрээһиммитин аал уоту күндүлээн, алгыс тылын тиэртэ алгысчыппыт Татьяна Егоровна Сивцева Сайнаара. Алгыһы салҕаан тойугунан туойда Надежда Маркова. Дьэ ол кэннэ астаах остуол тула олорон, ыллыктаах кэпсэтиилэр саҕаланнылар Нэһилиэкпит баһылыга А. А. Яковлев туох үлэ бара турарын инники былааннары видеонан көрдөрөн, сиһилии билиһиннэрдэ,ол кэннэ  Дьөппөммүт сайдыытыгар этиилэри, ыллыктаах санаалары биир дойдулаахтарбыт С. Е. Горохова, А. Е. Варламова Айысхаана, Г. З. Скрябина, Г. В. Иванова, З. И. Лыткина , А. М. Григорьева, Г. Г. Скрябина, В. Т. Матвеев. уо. д. а ис сүрэхтэриттэн баҕа санаалаах тиэртилэр. Төгүрүк остуолбут түмүгэр бары биир санааннан  үлэлииргэ, ону иилээн саҕалаан үлэлэтэргэ актив талылынна. Тэрээһиммитин Эрик Егоров таһаарыытынан Сомоҕолоһуу оһуохайынан ситимнээтибит. Дьоммутун кытта аныгыс Түмэл дьиэбитигэр Дьөппөҥҥө көрсүөххэ диэн тарҕастыбыт. Тэрээһини ыытыыга күүс көмө буолбут түөлбэлэрбит салайааччыларыгар, олохтоохторугар, Ли Марина Владиславовна салайар коллективыгар 1 Дьөппөн Администрациятын, тэрийээччилэр ааттарыттан махтал буолуохтун, өрүү маннык сомоҕо биир сутурук буолуоҕуҥ,бары доруобай чэгиэн сылдьыаҕыҥ.